DANIEL PANE

SELAMAT DATANG DAN MENIKMATI YANG TELAH DISAJIKAN

Selasa, 10 November 2015

Jamita Minggu XXIV D. Trinitatis, 15 Nopember 2015

BAHAN JAMITA
MINGGU XXIV DUNG TRINITATIS
Minggu, 15 Nopember 2015
Ev.: Daniel 12: 1 – 13; Ep.: Markus 13: 1 – 8; S.Patik: Jakobus 1: 12
Oleh: Pdt. Daniel Bonardo Pane, S.Th.

MARPANTAS NI ROHA DI NA MANAGAM HARORO-NA I
Patujolo
            Ragam do angka hamaolon dohot haporsuhon manang sitaonon na masa tu halak na porsea hinorhon ni haporseaonna. Di ragam angka na masa i, sipata ro do sungkunsungkun na marpardomuan tu hasatiaon ni haporseaon, nang hapapatar na disomba di haporseaonna i. didia do TUHAN i di ragam angka parungkilon i? na so mangula do TUHAN i paluahon angka na joujou tu Ibana? Nang angka sungkunsungkun na asing. Alai boha do parangenta molo songgop angka haporsuhon manang sitaonon tu halak angka na porsea dohot na joujou tu TUHAN i? alus ni sungkunsungkun on do na mansai ringkot sihangoluhon ni angka na porsea di ragam na masa tu ngoluna.
            Hombar tusi do turpuk jamita di minggu on, naeng ma adong parange ma mansai tandi sian halak na porsea i di pardalanan ni ngoluna huhut di bagasan panagaman hasisingkop bagabaga ni Debata tu angka na satia di haporseaonna. Managam haroroNa i, ima manangam hangoluan dohot las ni roha di HarajaonNa i. Harajaon na so pinauli ni tangan manang pingkiran ni jolma nang portibi on. Hombar tusi, tangkas ma itapaihutihut hatorangan ni turpuk jamita on.

Hatorangan ni Turpuk
            Bungku ni si Daniel, ima sada bungku na marisihon pangaramotion ni Jahowa tu angka naposoNa manang tu angka na satia tu Ibana. Nang pe ragam angka na binahen ni angka jolma na so olo manghaposi Jahowa, alai tongtong do dipatuduhon Jahowa do huasoNa paluahon angka na satia i. Jala bungku ni si Daniel on, marisihon angka ragam pangungkapon ni si Daniel taringot angka na naeng masa jala na ingkon saut do di ari na naeng ro di pardalanan ni ngolu bangso na pinilit ni Jahowa. Diungkap Jahowa do parnidaan ni si Daniel marhite angka ragam parnidaan marhite angka symbol. Bungku ni si Daniel on ima hata sosososo manang poda nang pangajarion tu angka na satia tu Jahowa asa unang marnaloja hasatiaonnasida i marnida angka ragam na jat manang haporsuhon di ngoluna tarlumobi naung torop halak na mardebatahon dirina, nang mardebatahon na adong di portibi on. Sai tongtong ma mian angka na satia i dihaporseaonna huhut managam ari las ni roha dohot hasongan di sada Harajaon na mansai uli jala sangap, ima harajaon na so ra suda. Bungku si Daniel on ima patoguhon haporseaon halak na satia i di angka hagogotan na masa uju panggomgomion ni Antiokhus Ephipanis IV, na mandok dirina hataridaan ni Debata, jala sude jolma ingkon marsomba ma tu ibana. Manang ise na so porsea ingkon marutang hosa. Torop do halak na satia mate hinorhon ni haporseaonna tu Jahowa.
            Turpuk jamita on ima pangungkapon na masa tu si Daniel taringot ujung ni ari manang ujung ni partingkian ni portibi on. Molo itaida di parmulaan ayat 1 di bindu 12 on didok “di tingki uju i”, tingki uju i martudutudu do i tu bindu 11: 40 – 45 na masa parporangan sada bangso tu bangso, na patuduhon gogo manang huaso ni harajaonna di portibi on, na so marnida be tu angka na marungkil, na pogos, nang na targosagosa di humaliangna. Tingki naung ngali holong i, jala lam torop mangulahon na jat na laho patuduhon gogona dohot huasona, hape ndang manahan saleleng ni lelengna na di ibana i. di tingki i ma ro si Mikhael, ima sada pardisurgo manang suruan ni Jahowa laho mangaramoti halak na porsea i di ragam angka parsorion manang ragam hasusaan manang hagogotan di portibi on. Jala si Mikhael do na disuru Jahowa laho marporang humongkop angka halak na satia, mamorangi angka gogo ni sibolis dohot elaelana. “Anak ni bangsoM”, martudutudu do i tu torop ni halak na porsea jala na satia. Molo pea dong na mandok “anak ni bangsoM” na martudutudu tu Pinompar ni Israel (sian harajaon manang bangso na pinillit), alai ndang na saluhutna angka pinompar ni Israel na olo satia di haporseaonna. Molo ujung ni ayat 1 patar ma dipaboa, “anak ni bangsoM”, ima halak na tarsurat goarna di pustaha hangoluan. Sian i tangkas ma idaonta jala antusanta “anak ni bangsoM” ima halak na satia jala na manahan sahat ro di ujungna.
            Jala di tingki i, tarsunggul ma sogot halak angka na mate, jala masa ma paruhuman. Na deba tu hangoluan salelenglelengna, na deba tu haurahon marragamragam, gabe biasbias salelenglelengna (ay. 2).Diungkap Jahowa do parnidaan ni si Daniel taringot paruhuman na parpudi, adong na tu hangoluan salelenglelengna, adong na tu haurahon marragamragam (patudos Pangungkapon 20: 11 – 14). Laos diida si Daniel ma muse halak na pantas marroha, marsinondang songon sondang ni langit, jala angka na manogunogu halak tu hatigoran marsinondang songon bintang (ay. 3). Di ayat 3 on ima sada tumpal ni halak na pantas marroha jala na so marnaloja di hasatiaonna gabe manjou halak (na so marDebatahon Jahowa, manang halak na gabe mandele jala manadingkon haporseaonna) tu hatiuron ni Jahowa, taruli di hamuliaon. Hamuliaon na so sian portibi on, alai hamuliaon na ro sian Jahowa, marsinondang songon bintang. Gok hatiuron dohot hamuliaon ma upana dung ro ari paruhuman i di angka na tongtong satia di haporseaonna.
            Alai adong ma hata tu si Daniel asa ditabunihon ibana angka hata jala disahapi pustaha na diidana i (ay. 4). Ayat on ndang na mandok ia sude na niida si Daniel holan tu ibana ma i, jala ndang ringkot dibaritahon. Alai ayat 4 sosososo do tu si Daniel asa ditiop ibana gomos angka na niidana i, jala disahapi sude angka hata dohot pustaha i. pustaha na marisihon sude angka na niidana (memeteraikan agar kitab yang berisikan semua yang Daniel lihat mengenai akhir zaman agar tidak ada yang sembarangan untuk mengubah mengenai akhir zaman sesuai dengan selera orang yang mengubahnya). Asa marhite pustaha i torop ma halak manulingkiti hata i, gabe tamba ma parbinotoanna taringot aha do na naeng masa tu portibi on nang angka na masa di ujung ni tingki portibi on.
            Diida si Daniel ma muse sada pangungkapon taringot adong 2 halak na asing na marpahean hori jongjong di atas aek ni batang aek (ay. 5 – 6). Ndang pola dipatorang dison ise do 2 halak na asing na niida si Daniel on, alai haroro ni 2 halak on ndada sian portibi on, alai 2 halak sitindangi pardisurgo. Dua halak on paboahon unang ma ganggu si Daniel taringot na tutu do sude na niidana i, manang haroro ni 2 halak na asing i pahothon angka hata nang parnidaan ni si Daniel. Hombar tu hasomalon di halak Jahudi hombar tu 5 Musa 19: 15, molo adong sitindangi 2 manang 3 halak, pahothon sada panindangion. Sungkunsungkun na tubu tu si Daniel “sadia leleng on asa jumping ujung ni halongangan na niidana i". marhite sungkunsungkun on, manghirim do si Daniel naeng ma angka niidana i pintor jumpang (nyata) di ngolu ni halak Israel manang angka na satia di haporseaonna.
            Alai dialusi pardisurgo i do sungkunsungkun ni si Daniel i marhite angka na niidana di ayat 7. Diida ibana pardisurgo marmangmang tu na Mangolu Salelenglelengna, ima Jahowa (hombar tu lapatan ni goar Jahowa, adong do na patuduhon hatongtongonna marhite goarna i). “sada tingki, dua tingki dohot satonga tingki” na martudutudu tu tingki na pinangke angka na mardebatahon dirina, na mangulahon na jat, jala angka na mardebatahon sileban laho marlomolomo jala manosak angka na na satia i, dung pe dapot tingkina, dapot manang jumping (nyata) ma songon na niida si Daniel i. dibege si Daniel do hata i, alai ndang dapot rohana aha do lapatanna ni sude na niidana i. Alai naeng ma diboto ibana aha do ujung sian na niidana i.
            Di ayat 9 disuru pardisurgo i asa laho si Daniel, jala tongtong ma gomos ditiop hata dohot naiidana i. jala di ayat 10 dipatorang na masa parpitaon tu halak na satia i, laho papitahon haporseaon. Naeng ma pita halak na satia i marhite angka hinahasit manang parungkilon ro sian angka na so marDebatahon Jahowa. (patudos 1 Petrus 1: 7). Alai ndang diboto angka parjahat na masa i, jala didatdati angka parjahat do mangulahon na jat hombar jala guru tu hagiot ni dagingna dohot portibi on. Alai halak na pantas marroha, diboto do saluhutna i, jala tung na so jumpang di ibana pangiburuon tu angka parjahat, jala ndang marnaloja ibana joujou tu Jahowa di hagogotanna i. Jala olat ni tingki pansadian ni pelean ariari sahat ro di tingki pajongjongonna hasogiron ni sipangago i saribu duaratus siapulu ari (1.290 ari) (ay.11). tingki 1.290 ari ima martudutudu partingkian harajaon ni Kaisar Antiokhus Ephipanias IV na mangalele angka na so olo manomba ibana.  Pelean ariari, pelean na so dihalomohon Jahowa jala pelean na sai dipasahat tu angka debata sileban di bagas joro i. dipasahat pelean hombar tu hasomalan ni Jahudi alai mandao do roha torop halak Jahudi sian Jahowa.
            Martua ma manang ise na manaonnaon, jala sanga dieak salpu ni saribu toluratus tolupulu lima ari (1.335 ari). Ima ariari paimaimahon haroro ni Harajaon ni Jahowa na manggomgomi sude harajaon na adong diportibi on. Salpu ma angka hinahansit ni angka na satia i, marujung ma hagogotan ni angka jolma na satia i, jala marujung ma sude hasangapon dohot harajaon ni portibi on. Tinggal ma paimahon tumpal ni angka saluhutna i hombar tu angka na niulana uju di ngoluna. 1.335 ari ndang na marlapatan 1.335 ari na i jumpang haroroNa i, alai na mandok marari be do saluhutna hape na di hasiangan on, jala adong do batas ni ariarina i. Laos di ay. 13, dipasingot do si Daniel asa marroha pangkirimon di ujung, jala maradian, asa hehe muse manjalo partohapanna di ujung ni angka ari. Adong do na mandok di ayat 13 on ma marujung ngolu ni si Daniel, jala di bagasan panghirimon tu hangoluan na so ra suda do ianggo ibana. Jala adong muse na mangalapati ay. 13 on asa borhat ma si Daniel tu manadingkon inganan pangungkaponna i, jala tongtong ma marroha marpangkirimon sahat ro di ujungna, jala ndang na marisuang hamatean ni angka na satia, ai taruli do ibana di hangoluan saleleng ni lelengna.

Hahonaan ni Turpuk
            Itaingot be ma, salpu do sogot angka harajaon ni portibi on dohot sangapna nang hagiotna. Unang hinorhon ni harajaon nang tingki portibi on dohot sangapna nang hagiotna, gabe dohot mate tondinta i.  Ndang mansohot hape hagogotan ni angka na porsea jala na satia tu marDebatahon Jahowa marhite Jesus Kristus sahat tu sadari on. Sai torop dope ro angka parungkilon manang hagogotan sian halak na so marDebatahon Jahowa. Torop ma halak na porsea sadari on joujou, didia do ho TUHAN? Laos adong muse na marsangkapi angka na jat songon balos ni angka na jat na didapotna. Torop do halak na mandele, alai adong do lam matolpang lam tajom, lam dibahen na hansit, lam pita haporseaonna. Sadari on torop do naung mardebatahon dirina, mardebatahon jabatanna, mardebatahon angka ragam tondi portibi nang mardebatahon angka sangap dohot pambahenanna na denggan angka naung niulana.
             Di angka na masa sisongon i, dijamitai do hita asa marpantas ni roha managam ari haroroNa i. ari na mansai sangap jala gok hamuliaon tu angka na satia. Salpu ma ariari ni portibi on jala masa ma Ari ni TUHAN. Sada sihabiaran do tu pigapiga jolma taringot haroro ni Ari ni TUHAN, alai tu angka na managam di haporseaon sada las ni roha do ari ni TUHAN i. ndang pola adong na boi mamastihon piga ari na i asa jumpang ari ni TUHAN, alai na ringkot sihobasonta ima haradeon ni rohanta managam ari i. marpantas ni roha ma hita nang pe hansit itahilala hinorhon haporseaonta. Unang ma marungkil hita hinorhon ni hajahatonta, alai martua ma hita marungkil hinorhon ni haporseaonta. Marpantas ni roha dison ima marparange ma hombar tu na hinalomohon ni Debata. Marbisuk ma hita di hasiangan on mangulahon sude ulaonta dohot panghobasionta huhut managam ari haroroNa i, ima haroro ni Kristus na paduahalion mamboan angka las ni roha dohot hamuliaon ni Jahowa tu angka na sai managam harorona i. sai unang ma laos lalap hita mangalului angka na ringkot di ngolu pardaging on gabe tading hita paradehon dirinta managam ari na balga i, jala si unang ma marnaloja hita mansoi angka donganta asa parsidohot di na managam ari na mansai uli i.
            Ise do na mandapot tumpal hangoluan na so ra suda i? ima halak na satia ro di ujungna. Ianggo halak na sai mangulahon na jat, nang marsangkapi na jat ndang ingot be nasida di ariarinasida i na lao salpu do, jala ndang taruli di hangoluan i. antong sai burju ma hita rasirasa mate, dungi lehononna ma tumpal hangoluan i. amen.

Usulan ni Ende Huria:
  1. 10: 1+ 4 – 5
  2. 181: 2 – 3
  3. 275:1 – 2
  4. 213: 1 + 4
  5. 539: 1……..
  6. 541: 2 + 5 manang 769: 1 – 2
  7. 392: 1…..

.