DANIEL PANE

SELAMAT DATANG DAN MENIKMATI YANG TELAH DISAJIKAN

Senin, 04 Mei 2015

Jamita Minggu Trinitas, 31 Mei 2015

BAHAN JAMITA
MINGGU TRINITATIS
Minggu, 31 Mei 2015
Ev.: Jesaya 6: 1 – 8; Ep.: Pangungkapon 4: 1 – 11; S.Patik: Korint. 14: 1 – 3

On do ahu, suru ma ahu!

Patujolo
            Horas Trinitatis ma tu hita saluhutna. Marolopolop jala mariaria ma hita marnida hasangapon ni Jahowa Debata, naung patar di bagasan Jesus Kristus dohot di Tondi Parbadia. Jala marhite jamita minggu on, andap ma parnidaanta, na dohot do angka pardisurgo marolopolop marhite na mangendehon habadiaon ni Jahowa, Debata.
            Mansai maol do jumpangan halak na olo suruon tu angka ulaon na mansai borat, tarlumobi angka ulaon na so adong taruli pansamotan sian parulaonna i. alai molo adong do pansamotan di hirim sian na ni ula i. Alai di turpuk jamita on, tangkas do idaonta haradeon ni si Jesaya di parsuruon di sada ulaon, ndada ulaon na neang na naeng siulahononna, manang ndang na gabe adong pansamotan na didapotna sian ulaon i. marhite turpuk jamita on naeng ma lam antus jala andap hita di panjoun manang di ulaon naung itajalo sian Debata di huria i. antong itapamanat ma hatorangan ni turpuk jamita on.

Hatorangan ni Turpuk
            Di ayat 1 dipaboa panurat ni bungku on do andigan tingki na masa panjouon dohot pangoloion ni si Jesaya. Dipaboa do di taon hamamate di raja Usia (Uzzia, Azarya) hirahira taon 740-739 sM. Hamamate ni Uzia paboahon na marujung ma kemakmuran Yehuda, jala marudut ma tu ragam krisis ekonomi – politik Jehuda. Sian hatorangan ni turpuk jamita on boi ma idaonta di panjouon ni si Jesaya on di tongatonga krisis ekonomi-politik Jehuda.
            Di tongatonga na masa i, diida si Jesaya ma hamuliaon ni Jahowa di bagas joro. Diida ibana TUHAN (Jahowa/ YHWH) hundul di atas habangsa na timbo jala marmulia, jala angka rambu ni ulosna (paheanNa) manggohi bagas joro. Parnidaan (pangungkapon/ vision) ni si Jesaya on patuduhon harajaon ni Jahowa na marmulia mangatasi harajon na diportibi on. Nang pe naung marujung raja Uzia, na ditanda sahalak raja na mambahen sonang angka na ginomgomna, alai Jahowa (YHWH), Debata ni Israel tung na so hea marujung. Harajaon saleleng ni leleng na do harajaonNa.
            Laos diuduti muse diida si Jesaya ima na jongjong surusuruan serapim mangendehon ende hamuliaon manang ende habadioan ni Jahowa, Raja saleleng ni lelengna. Serapim ima sada pardisurgo na mian di hamuliaon ni Jahowa jala mangendehon hamuliaon ni Jahowa. Haroro ni Serapim patuduhon haroro ni hamuliaon ni Jahowa (ay. 2 – 3. Ende habadion na niendehon angka serapim ima ende na paboahon na marasing do Jahowa, Debata ni Israel sian angka debata ni portibi on. Badia (qadosy) pabotohon hasurungan manang haasingan ni Jahowa. Didia do haasinganna? Ima di hamuliaonNa, di huasoNa, dhot di harajaonNa.      Jadi humuntal ma ojahan ni tiang sian soara ni na manjou gok timus joro I (ay. 4) na paboahon ndang boi manahan portibi on marnida manang mandapot hamuliaon ni Jahowa molo holon gogo ni portibi on, songon dia pe haulion manang gogo ni portibi dohot na binahen ni jolma tung na so margogo do i saluhutna molo songgop hamuliaon ni Jahowa.
            Dung diida si Jesaya na masa i, pintor ditanda do dirina maradophon hamuliaon ni Jahowa. Jesaya, ima sahalak anak ni bangsawan Jahudi mananda hadosaonna di hamuliaon ni Jahowa i. diparhatopot ibana do hadirionna dohot hagaleonna. Dirimpu ibana do gabe hamatean na nidapotna dung diida angka na masa I (ay. 5). Alai ndang na marujung tu panolsolion, ai marudut do tu pabadiahon si Jesaya marhite batu arang na gara na binuat sian langgatan dohot gansip. Marhite na masa i paboahon naung dinsat utang dohot nunga hinunghupan dosana (6-7). Hamuliaon ni Jahowa mamboan haimbaruon tu angka na marnidasa, hamuliaon ni Jahowa patubuhon panolsolion dohot panandaion diri tu na marnidasa, jala hamuliaon ni Jahowa manghorhon panesaon dohot haluaon sian angka dosa.
            Dung diparbadiai Jahowa si Jesaya marhite surusuran na mambuat batu arang na gara i, tarbege ma soara ni TUHAN (YHWH/ Jahowa) I na mandok: “ise do suruhonHu, jala ise pardalannami?” dungi I dialusi si Jesaya: “Dison do ahu, suru ma ahu” (ay. 8). Ngolu na imbaru manghorhon pameleon diri. Dipelehon do dirina tu sada ulaon na mansai borat manang na mansai dokdok. Ndang na dihirim si Jesaya mandapot pansamotan manang arta ibana sian ulaonna i. Molo idaonta do na masa di masa hapanurirangonna, mansai ragam do angka na dokdok diadopi manang na masa di ngoluna. Tangkas do dipabotohon gombaran na naeng diulaon ni si Jesaya (ay. 9 – 13). Marhite alus ni si Jesaya on andap do idaonta na polin do ibana manadinghon angka hasangaponna, hamoraonna, laho mangulahon lomo ni roha ni Jahowa di hapanurirangonna.

Hahonaan ni turpuk
·         Sada na mansai ringkot idaonta marhite hatorangan ni turpuk on ima harajaon ni Jahowa, Debatanta marhite Jesus Kristus nang na tongtong marsaor marhite Tondi Parbadia ima harajaon na salelenglelengna. Hamuliaon ni Jahowa manggohi harajon ni hasiangan on. Harajaon na hot do ianggo harajaonNa i.
·         Angka surusuruan pe mangendehon ende hamuliaon ni Jahowa. Na paboahon tu hita saluhutna, ianggo hamuliaon ni Jahowa ima hamuliaon na so adong hatudosan. Angka pardisurgo pe mangendehon ende hamuliaonNa i.
·         Hapapatar ni hamuliaon ni Jahowa mamboan hita mananda hadirionta, ise manang na boha do hita diadopan ni Jahowa. Unang be pangasahon hamoraon, dohot pambahenanmu di adopan ni Jahowa, alai martoruk ni roha ma dohot tanda ma dirim dohot gogom di adopan ni Jahowa.
·         Dung mananda hita di hahurangan manang dihagaleon, ndang dipasombu Jahowa jolma na mananda dirina mian di hagaleon, dosa dohot haramunonna. Alai marudut do tu haimbaruon na binahenna, asa tanggal sude angka dosa dohot haramunon, jala taruli di ngolu na imbaru na gok hagogoon.
·         Dung marhgogoon dohot marngolu na imbaru, marudut ma tu pameleohon diri mangulahon ulaon dohot panjouon ni Jahowa di ragam ulaonta, tarlumobi ulaon manghobasi di huria i. Unang ma hirim sinamot dohot hauntungan materi, dohot hasangapon na rumar laho mangulahon ulaon panghobasion di huria i. ulaon na ringkot ulaonhononta ima ulaon harajaon na so hea marujung, ai tusi do hita tarjou. Naeng ma pamanganta unang be songon pamangan na ramun, dohot ngolunta on songon ngolu na ramun. Naeng ma pamanganta gabe barita hapanurirangon di harajaon ni Debata.
·         Di minggu Trinitatis on, dipataridahon do tu hita hamuliaon ni Debatanta sitolu sada. Sada do ianggo Debata ima Jahowa. Debatanta i itanda ma di bagasan hadirion ni Jesus Kristus dohot di Tondi Parbadia. Hot do harajaonna i, jala itaulahon ma ulaon harajaon i dibagasan hiras dohot las ni roha. Hasangapon ma di Debata Jahowa, nang Jesus Kristus dohot Tondi Parbadia nuaeng tongtong sahat salelengna. Amen.

Pinatomutomu: Pdt. Daniel Bonardo Pane, S.Th.
HKI Resort Khusus Hutasoit Pardomuan