Bahan Jamita Minggu,III dung Trintatsi, 26 Januari 2014

BAHAN JAMITA

MINGGU, III DUNG EPHIPANIAS

Minggu, 26 Januari 2014

Ev.: 1 Korint 1: 10 – 18; Ep.: Psalmen 27: 1, 4 – 9; S. Patik: Jeremia 9: 22 - 23

Disurathon: Pdt. Daniel Bonardo Pane, S.Th.

HASADAAN MARBARITA NA ULI

Patujolo

            Molo itaida jarijari di tanganta, boi do itadapot parsiajaran sian i. Molo mangangkat sada batu bata, ingkon boi rap jarijari ni tangan on mangangkat batu i. Ndang boi holan jarijari martudu, manang indung ni jari, alai sude jarijari i mardos ni roha jala rap laho mangangkat batu i (patudos tu sapu lidi). Sian turiturian i boi do idaonta dos ni roha dohot dos ni tahi laho patulushon sada ulaon na ringkot di ulaon ni parsaoran. Ganup parsaoran pasti do adong lapatan manang tujuan ni parsaoran i,  jala adong ma dalan na binahen asa jumpang tujuan manang na dihirim sian parsaoran i. Sai unang ma adong parange na holan mangaup tu dirina sandiri jala na so mangharingkothon parsaoran i, laos ido mula ni sega dohot sursar punguan parsaoran i.  

            Songon i ma nian parsaoran ni halak Kristen. Unang ma nian adong parbolatbolatan manang marsiallangan roha angka na diparsaoran i. parsaoran ni halak Kristen ima parsaoran na dijou marhitehite pandidion di bagasan Goar ni Ama, Anak, dohot Tondi Parbadia. Jala parsaoran i adong do tona na ingkon diulahon: ima mamaritahon Barita Na Uli taringot Kristus. Nang pe ragam angka hamaolon na diadopan di parsaoran i, isarana latarbelakang dohot hasomalan na masa di huta manang di ganup halak di parsaoran ni Kristen, jala angka pangajarion na marragam, alai ingkon ingot do, parsaoran ni halak Kristen ima parsaoran marbarita na uli.

Hatorangan ni Turpuk

            Huta Korint, ima sada huta na mansai maju jala ragam angka bangso na ro di huta i, jala didukung huta i ima huta pelabuhan dohot partigatiga jala masa ma marcampur hasomalan (budaya) hinorhon ni ragam hasomalan (budaya) na ro di huta i. Asing ni i, ragam do huria na adong di huta i. Ragam ni huria molo so adong hasadaan huria, pasti do gabe boi tubu parbolatbolatan manang menanggap huria na sada tingkos jala huria na asing dang tingkos hombar tu pangajarion n (dogma) na masa di huria i. Dogma na dianut sada huria marharoan sian latarbelakang dohot hasomalan ni sahalak tokoh na patut ditirunasida laho mamaritahon na uli. Hinorhon ni i adong ma didok, horong ni si Kefas do hami (ima penganut ajaran ni Kefas (boi do tarida sian halak Kristen Jahudi na mian disi jala na dididi si Kefas); adong mandok horong ni Paulus do hami (halak na dididi si Paulus); horong Apollos (boi ma dohonon horong ni huria na so sian Jahudi); adong muse horong ni Kristus dohot horong na asing.

            Marnida ragam ni horong huria (hombar dogma/ pangajarion) na masa di Korint, ditongons Santo Paulus do surat na manosoi angka huria na di huta i asa unang masa parbolatan. Jala diigil si Paulus do asa hot nasida binahen ni sada ni roha dohot sada pingkiran di parsaoran ni huria di huta i (ay. 10). Hasadaan do hagogoon laho mangadopi angka na masa di huta i. Nang ragam angka parpoada haliluon na sai jotjot manorui silang ni Kristus (hombar pangantusion na masa: silang ima sada hailaan; manang ise na diparsilanghon, ima halak na jahat na so boi be diampuni angka pangalaosionna); parpoda haliluion na naeng manegai angka huria na di huta i.

            Dipaboa si Paulus do sian dia do didapot ibana barita taringot huria na di Korint, sian sada keluarga Kristen ima keluarga si Kloe na sai jotjot mamboan barita taringot huria i tu si Paulus (ay. 11). Barita na didapot si Paulus sian keluarga i ima taringot parsalisian ni huria na marragam i. Na mengaggap huria/ horong ni huria do na tingkos jala sintong. Nunga mago pe mula ni tujuan ni huria i. Marsiallangan roha, jala on ma na sai jotjot dipangke angka parpoda haliluon manang sibolis laho manundati misi ni huria i. Di ayat 12 dipaboa si Paulus do ragam horong ni huria di huta i. Molo masa do parsalisian manang parbolatan ni huria marlapatan do i mambagi Kristus (ay. 13). Ai Kristus do na Raja jala Ampuna ni huria (Huria: Ampuna ni Tuhan), jala Kristus do na mate tarsilang humongkop angka jolma na mardosa asa taruli jolma i haluaon marhite adong roha manolsoli dosana jala manjanghon Jesus di ngoluna. Jala dididi na hatandaan pamelehon dirina gabe ampuna ni Kristus (Kristen: Ampuna ni Kristus). Holan dibagasan Debata Jahowa, Ama i; dohot Jesus Kristus, Anak ni Debata, dohot Tondi Parbadia do pandidion alana ido patupa haluaon di jolma i. Ndada goar ni na asing tarlumobi goar ni si Paulus alana ndada si Paulus na paluahon jolma i.

            Di tingki di Korint si Paulus dididi do si Kripus dohot si Gayus na gabe dongan pangurupi si Paulus laho marbarita na uli di huta Korint. Jala dipaandaphon dohot disosoi asa unang marhite goarna si Kripus dohot si Gayus patupahon pandidion alana ndang si Paulus na paluahon jolma i (ay. 14 – 15). Jala ndada holan na dua halak i tahe dididi, alai dohot do pangisi bagas ni Stepanus (ndada Stepanus na mate rajam). Di ayat 17 ingkon manat do hita mangalapati. Nang pe didok si Paulus ndang disuru Kristus ibana mandidi (na martudutudu hasomalan manang pandidion na disi: molo sahalak apostel mandidi sada halak gabe Kristen, diantusi do i na gabe sisean ni na mandidi i jala ampuna ni na mandidi i do ibana). Lapatanna, holan pagodang torop ni halak gabe masuk tu huria i alai ndang adong tujuan dasarna; “marbarita na uli”. Jala dipandaphon si Paulus do i di ayat on, “marbarita na uli do ulaonna nang pe dang boi tarsirang sian pandidion hombar tu pangantusion na tingkos dohot na sintong. Alai marbarita na uli pe ibana, ndada na mangasahon hata bisuk na binoto ibana (filsafat/ pangantusionna) asa unang gae diorui silang ni Kristus.

            Haotoon do barita taringot silang jala diida do i songon haotoon tu jolma na so mangantusi taringot haluaon na pinatupa ni Jahowa marhite silang ni Kristus (ay. 18). Jala pangantusionnasida i, na oto do molo Jesus, Anak ni Debata olo mate humongkop halak pardosa, alai tumagonan do i disiaphon sian tanoon. Alana nasida holan marnida mate di salib i alai ndang marnida aha do panghorhon ni silang ni Kristus i. Jahowa, Debata marhite Jesus Kristus do patupahon haluaon tu jolma i marhite hamamate ni Kristus di hau silang humongkop dosa ni angka jolma na ingkon patut diuhum di paruhuman salelengna jala na so taruli haluaon; jala di silang i do Jesus singkat ni jolma mamorsan sitaonon na sepatutna ditipahon jolma na mardosa asa marhite i boi ma jolma manolsoli dosana jala ro pasahathon/ mamelehon dirina gabe ampuna ni Kristus.           

Refleksi Teologis – Hahoonaan Teologi Turpuk

            Ngolunta sadari on ragam do angka ngoluni jolma itaadopi, adong ma i sian parhepengonna (ekonomi), adong sian parsaoranna, adong sian parbinotoan (pendidikan) manang hasomalan na masa songon i nang ragam ni huria na berkembang. Jala molo diida marragam adong huria boi do adong hinorhon ni hansit ni roha manang manganlang roha di huriana na sada gabe haluar sian huria i jala mamungka huria na imbaru. Alai nang pe songon i di ragam huria na masa, sai unang ma nian mago tujuan ni huria i, ima mambaritahon barita na uli; parsaoran na marbarita na uli marhite hata dohot parange. Mambaritahon taringot silang ni Kristus asa unang adong be jolma i mangasahon dirina, gogona, manang parbinotoanna laho mandapot haluaon. Diigil do diturpuk on asa sada ma nian huria na marragam, sai unang ma na mandok : holan hurianami do na sintong, molo huria na asing huria sakit hati dohot huria na so jelas. Ai sada do Kristus i songon i do nang huria ingkon sada. Ragam do huria alai sada do Tuhan; ai daging ni Kristus do huria i jala ruas huria na marragam i (patudos 1 Kor. 12: 27). Boi do itaida jarijari ni tangan manang sapu lidi, ingkon dos do angka jarijari dohot lidi asa tolhas jala jumpa ma tujuanna hombar tu fungsina.

            Songon i do nang di huriata sadari on. Ragam pangantusion; ragam latarbelakang ngolu; ragam parbinotoan alai unang ma gabe patubuhon parbolatan. Unang ma nian adong mandok: horong/ pro tu Pandita (alana Pandita do torus donganna jala dianggap tingkos) jala na asing horong/pro tu guru huria do hami (ala holan guru huria do donganna, jala dianggap tingkos) dohot na asing. Ndada Pandita manang guru huria ampuna ni huria manang ruas i alai holan Jesus Kristus do ampuna ni huria dohot ruas. Jala unang be adong horong ni ruas do hami alana, ndang adong be tingkos idaon pangalaho ni angka parhalado (Pandita tu guru dohot parhalado na asing na sai jotjot marsiallangan roha). Ndada Pandita manang guru huria manang pangajari di huria i na paluahon ruas ni huria mana jolma i, alai holan marhite silang ni Kristus do. Ido na ingkon dibaritahon songon barita na uli di turpuk on.

            Molo adong pe beda pangantusion manang be pendapat unang pintor i mula ni parbolatan manang hasesega ni parsaoran di huria. Boi do i gabe kekuatan molo ingot do hita tu pangantusion tujuan ni huria, ima mambaritahon haluaon tu ganup jolma na pinatupa ni Jahowa, Ama i marhite Jesus Kristus. Songon falsafah ni Indonesia, Bhinneka Tunggal Ika: nang pe marragam alai sai tongtong do sada. Sada di tujuan, sada di panghirimon dohot marsada ni roha laho patupahon ulaon ni huria patimbulhon harajaon ni Debata dohot haluoan i tu portibi on. Bekerjasama dohot sama kerja ma nian sude parhalado (Pendeta, Guru huria dohot parhalado nang ruas pe) laho mangulahon ulaoan marbarita na uli dohot patimbulhon Harajaon ni Debata marhite huria, jala unang ma adong na marsiallangan roha manang mangaap dirina tingkos laho mangulahon pangobasionna. Jala unang tapangasahon gogo manang parbinotoanta manang pengalamanta laho patupahon i alai pangasahon ma habisukhon na sian Jahowa, Debata asa unang diorui jolma silang ni Kristus i. Hasanagapon ma di Jahowa, Ama i, dohot Anak-Na, Jesus Kristus dohot Tondi Parbadia olat ni on sahat tu salelengna marhite huria-Na. Amen.

Angka Ende:

1. 362: 1 – 3
2. 424: 1 – 2
3. 169: 1 + 3
4. 216: 2 + 5
5. 122: 1.......
6. 277: 1 – 2
7. 519: 1.....

Bahan Jamita I Dung Ephipanias, 12 Januari 2014

BAHAN KHOTBAH

MINGGU I SETELAH EPHIPANIAS

Minggu, 12 Januari 2014

Ev.: Mateus 3: 13 – 17; Ep.: Psalmen 40: 2 – 11; SP.: 1 Petrus 5: 6

Pdt. Daniel Bonardo Pane, S.Th.

Patutoru Diri Tu Jahowa Hataridaan Unduk di Jahowa

Pendahuluan

            Di tingki nuaeng nunga maol be jumpangan halak na olo patutoruhon diri manang rohana. Torop do halak na sai manghirim asa dipasangap jolma ibana, diargai jala torop jolma mananda ibana hinorhon ni hasangaponna. Boi do i tarida sian parange na holan mamarenta jolma jala na holan hatana begeon jala diulahon. Na so olo rap mangula, jala ndang adong parange na olo unduk tu na mamarenta ibana, ai dirimpu molo diparenta ibana gabe moru ma sangapna.           

            Marhite turpuk Jamita on, Jesus Kristus mangalehon sada tiruan na denggan tu halak na manghaporseai Ibana, jala nasida pe ingkon do mamarangehon tiruan na binahen ni Jesus. Jesus na tuat sian hasangapon dohot hamuliaonNa mambuat rupa hatoban, jala sarupa tu jolma angka na mardosa nang pe Ibana sandiri ndang mardosa (Philp. 2: 7). Di turpuk on ndada tu jolma unduk Ibana, alai tu Jahowa, Ama na marsuru Ibana.

Hatorangan ni turpuk

            Nunga lam marsiadu torop jolma mangalului hasangapon, hamoraon, dohot hagabeon, ndang pola be diharingkothon songon dia do pengaruhna tu angka humaliang. Nunga samak be parnidaan manang parbinegeannasida taringot harajaon ni Jahowa, Debata. Jala sai na adong do na lalap di angka hansit, parungkilon, parsorion alai ndang adong roha na pasahathon diri tu Jahowa; nunga maol adong jumpang roha na olo mangurupi.

            Di tonga na masa i, ro ma si Johannes, anak ni malim Sakarias pabotohon barita hamubaon ni roha ala nunga jonok be Harajaon ni Debata. Barita hamubaon on ima sada barita manang jamita asa sude halak na manangihon jamita on mangubah parange, pamingkirion na maralo tu na nihalomohon ni Jahowa. Ndada holan mambaritahon hamubaon i alai dohot do ibana patupahon pandidion di batang aek Jordan. Pandidion na pinatupa ni si Johannes ima pandidion hamubaon ni roha, pamingkirion dohot parange jala marhite i do adong ngolu na imbaru. Jala marhite pandidion ni halak naung dididi pasahathon dirina tu Jahowa Debata. Ndada si Johannes na manesa ni torop jolma na dididi Ibana, alai hata ni Jahowa marhite aek Jordan i do na manesa dosa i.

            Di na tingki na masa i, ro ma Jesus ro ma Jesus sian Galilea tu batak aek Jordan, inganan ni si Johannes Pandidi asa dipadidihon si Johannes Ibana (ay. 13). Status ni Jesus dison ndada halak na mardosa. On ma tiruan na binahen ni Jesus tu halak na manghaporseai Ibana ingkon do boi patutoruhon dirina. Gabe dos do Ibana tu jolma alai ndang sian jolma Ibana. Ndang na dipatuduhon Ibana na tuat sian hasangapon dohot hamuliaonNa. Tubu di tongatonga ni keluarga parhau, ima keluarga na pogos jala na so masuk etongon di toropan jolma humaliang. Ndang na so boi Ibana tubu sian keluarga na mora manang na sangap, alai na ringkot idaonta ima tiruan na denggan nang pe maol diulahon torop jolma hinorhon ni angka panghirimon manang sintasinta ni ngoluna.

            Ditanda si Johannes do Jesus, alai panandaion ni si Johannes tu Jesus ndada holan panandaion na asal mananda. Panandaion ni si Johannes ima panandaion na polin taringot hadirion ni Jesus sandiri. Boi do itaida panindangionna: “ahu do nian patut didionmu hape Ho ro mandapothon ahu.” (ay. 14). Dison ditanda jala diboto si Johannes do dirina di adopan ni Jesus. Naeng do nian Jesus mandidi si Johannes dihirim si Johannes. Alai dialusi Jesus ibana: “Songon i ma jolo! Ai tama do itapajongjong nasa hatigoran! (ay. 15). Sian alus na pinasahat ni Jesus boi do itaida haoloonna asa jumpang songon sangkap ni Ama na marsuru Ibana di na patupahon haluaon marhite na mangalehon dirina gabe pelean na badia jala arga di adopan ni Debata (ida. 2 Musa 40: 12 – 15; 3 Musa 16: 4, 23 – 24). Alai ringkot do itabereng, ia pandidion na binahen ni si Johannes tu Jesus, ndada pandidion hamuaon ni roha, alai marhite i tangkas ma panahapon haundukhon ni Jesus tu Ama na marsuru Ibana jala manahapi ai Jesus do Anak ni Jahowa, Debata, halomoan ni roha ni Jahowa, na marsuru Ibana na tanda marhite na mungkap langit, jala tarida mijur Tondi ni Debata songon darapati, sada tanda hamuliaon manang hasangapon ni Debata  (ay. 16 – 17). Marhite on tangkas ma idaonta Jesus do Anak ni Debata, halomoanNa na patuduhon panghaholongion ni Ama na marsuru Ibana, jala na so hea ditadinghon Jahowa, Debata i Jesus.

Hahonaan ni Teologi ni Turpuk

            Nunga tangkas dipabotohon taringot hataridaan ni Jesus na gabe tiruan marhite na unduk do Ibana tu angka sangkap ni Jahowa Debata, Ama na marsuru Ibana di na laho patupahon haluaon tu halak na olo marhamubaon ni roha. Jala marhite i tangkas muse itaida na dipatimbo Jahowa, Ama i do Ibana muse marhite soara na manahapi Jesus do Anak ni Jahowa, Debata.

            Antong hita pe naung tardidi di bagasan goar ni Debata Ama, dohot AnakNa, Jesus Kristus dohot Tondi Parbadia ingkon boi do unduk hita tu Ibana, patoruhon diri dohot roha di adopan ni Debata, Ama i, jala molo ro tingkina dipatimbo muse ma hita di bagasan hamuliaonNa. Molo naung tardidi do ngolunta, marlapatan ma i, gabe Jahowa ma na nampuna hita, jala hita pe polin pasahathon diri, nang ngolunta tu adopan ni Debata. Marhite i muse diuduti na sai tongtong do hita didongani Tondi Parbadia do hita di ngolu sadari on. Molo jumpang tingkina, patimboon ni Debata do hita di bagasan hamuliaon dohot hasapon ni Debata marhite Jesus Kristus i. Amen

Angka Ende Huria

1. 23: 1 – 3
2. 74: 1, 3
3. 72: 1, 5
4. 474: 1 – 2
5. 75: 1....
6. 464: 1 – 2
7. 515: 1.....