Jamita/ Khotbah Minggu III Dung Trintatis: 24 Juni 2012

Jahowa

Debata na so boi antusan sian habisuhon ni portibi on sandiri !

(Job 38: 1 – 11)

Digurithon: CPdt. Daniel Bonardo Pane, S.Th.

HKI Patane, Res. Patane

Patujolo

            Ganup jolma na di portibi on pasti do hea mangadopi parungkilon manan parsitaonon jala boi do parungkilonna manang parsitaonon na diadopi i, mansai borat manang dokdok. Jala, boi do rajumanta, ndang adong halak na diportibi on na sae holan marungkil manang marsitaonon di ngoluna. Jala pargabus situtu do halak na mandok: “ai holan na marungkil do au na mangolu on”. Parungkilon manang parsitaonan na mansai dokdok, boi do mambahen jolma i gale, mandele jala so marpanghirimon (na boi mambahen jolma i mangulahon songon halak naung so marpanghirimon (hopeless) isarana bunuh diri).

            Ise do na mangadopi parungkilon manang parsitaonon? Songon na dipatorang di ginjang, didok ganup jolma. Marlapatan ma i, halak na daulat manang na jahat, tong do hape mangadopi parungkilon manang parsitaonon. Halak na so marminggu, manang na so hea marminggu tong do mangadopi parungkilon. Molo songon i, aha ma laba ni na burju manang na daulat molo tong do marungkil manang marsitaonon di ngoluna? Torop do halak tarlumobi na burju mandok: dia do labangku na ringgas marminggu dohot mandohoti partangiangan, hape tong do marungkil au manang marsitaonon, jala tong do pogos. Molo songon i, ingkon rajumanta do muse, aha do lapatan ni sitaonon manang parungkilon i? Na so diida manang na dipaso Jahowa do halak na daulat i marungkil manang marsitaonon?

            Songon sada patujolo, boi ma taida sahalak na daulat di bagasan parungkilon manang parsitaonon na mansai dokdok marhitehite bungku ni turpuk on. Ala ni i, ingkon manat do hita mangihutihuthon bungku ni turpuk on, asa taboto songon dia do pardalananni ngolu na daulat i di parungkilonna manang disitaononna, asa unang masa salah mangantusi taringot bungku ni turpuk on.

Hatorangan

            Sahat ma hita tu hatorangan ni turpuk. Andorang dipatorang turpuk jamita on, hupatorang ma patujolo pardalanan ni bungku ni turpuk on sahat tu turpuk on, asa boi dilapati pardalanan ni turpuk jamita on. Di bindu 1 di bungku on, dipatorang do taringot ise do si Job, jala dipatorang ma mula ni parsitaonon ni si Job di ngoluna. Di bindu 1 on ma patar dipabotohon, sian parbinotoan ni Jahowa do manang aha na masa tu ganup halak, tarlumobi na niasianna, jala adong do sada hal na mansai ringkot di hangoluhon ni ganup halak, taringot hosa ni jolma, ia hosa ni jolma i, ido sasintong na na umringkot di ngolu ni jolma jala tung na so adong na boi mambuat hosa so ingkon Jahowa sandiri na mambuat, ai sian Ibana do i. Di bindu 2, dipatorang lam tu dumokdok manang tu hansitna parniahapan ni si Job, sahalak na daulat. Laos di bindu 3 ma tarida ma, ia si Job sandiri nunga naeng ndang manahan di parniahapanna i. tarida ma di na mamburai ari hatutubuna.

            Di bindu 4 – 37, dipatorang ma taringot pangkation ni si Job tu angka donganna. Nang pe nunga dumokdok parniahapan ni si Job, tung so adong do angka dongan ni si Job boi mangalehon hata apulapul dohot hata togar. Pola do diuhum angka donganna i ibana di parsitaononna i. Dipangkation ni si Job rap dohot donganna i, si Job angkat bicara na manggombarhon tuntutan, boasa boi songon i parniahapanna hape halak na daulat do ibana. Jala disi ma si Job pabotohon angka hadaulatanna di parngoluanna, jala dison ma si Job naung so manahan be di dokdok parniahapanna (Job. 23 – 24; 26-31). Songon i ma jotjotan angka jolma, mangasahon angka ulaonna na denggan diadopan ni Jahowa di parsitaononna, na manggombarhon Jahowa dang adil tu angka na mangulahon na denggan di parngoluanna.

            Laos diuduti tu turpuk jamita on, ro Jahowa tu si Job marhitehite angka habahaba. Haroro ni Jahowa dison, ima naeng mangalusi taringot tuntuttan ni si Job di tongatonga parsitaononna. Dipangkataion di turpuk on, dipataridahon do taringot huaso dohot gogo ni Jahowa, tung na so adong do na boi mambatasi huaso ni Jahowa. Jala on ma na gabe kritikan tu ganup halak, termasuk tu si Job na holan mangantusi Jahowa sian parbinotoann manang habisuhon na adong di ibana. Jala boi do torop do halak naeng mangatur Jahowa marhitehite habisohonna. Dirimpu toropan ni halak do habisuhon manang aha na adong di ibana, boi gabe mangatur Jahowa laho mangulahon ulaon-Na.

            Turpuk jamitaon sasintongna berlanjut do sahat tu bindu 41. Alai ala naung diaturhon na naeng sijamitahon holan tu ayat 11, umbahen i sahat di ayat i ma panorangion ni turpuk on, alai nang pe disinggu saotik sahat tu panutup ni bungku ni turpuk on.

            Ayat 1 – 3, dipatorang do parhitean ni Jahowa ro tu si Job jala manghatahon hata-Na. Jala dimulaima sian mangajuhon sungkunsungkunna sasintongna na so boi alusan ni si Job manang jolma sian parbinotoan manang habisuhonna sandiri. Jala di ayat 3, mansai tangkas do dipabotohon haradehon ni si Job laho mangalusi sungkunsungkun na naeng sinungkun ni Jahowa tu ibana. Hata mangajari di ayat 3 on, dang marlapatan si Job gabe guru, alai adong tuntutuan paboahon (terjemahan bahasa asli: memberitahukan) taringot tu sungkunsungkun na disungkuhon Jahowa tu ibana.

            Di ayat 4 tarida ma Jahowa na menantang si Job dohot perbinotoan na adong di ibana. Jala dison ma patar, ia habisuhon ni jolma tung na so boi do manimbangi angka na binahen ni Jahowa tu jolma. Laos di ayat 5-7, dimulai Jahowa ma sian ulaonna na manompa jala na mangatur angka na niulana. Nda holan insiatif Jahowa sambing do sudena i, na mambahen sudena mansai uli jala singkop di jolma i? Tung so hea do Jahowa manjalo panuturion manang gogo sian jolma i. Tung songon dia pe timbo ni parbinotoan ni jolma taringot portibi on, tung so boi do i gabe patohan tu ulaon ni Jahowa.

            Ayat 8-10, tarida ma gogo ni Jahowa do na mangatasi sandok na tinompa-Na. Laut dipangantusion ni teologi PL (Padan na Robi) martudutudu tu hagogoon ni portibi on, jala boi do laut pangoluhon laos pamatehon jolma i. Berarti hagogoon sian portibi on, tong do di toru ni huaso ni Jahowa. Molo taida ayat 9, hata “ombun” di teologi PL marlapatan do i hamuliaon dohot hasangapon. Berarti, sian Jahowa do haroro ni hamuliaon dohot hasangapon. Jala di ayat 10, Jahowa do na mambuhul angka na binahenna. Sude na i, marlapatan, tung Jahowa sandiri do na patupahon angka na uli dohot na singkop di ganup parngoluan ni jolma. Jala marpardomuan ma i tu hatoran na naung dipatorang di ginjang, sude na marhosa, ima milik ni Jahowa do saluhutna.

            Ayat 11, angka galumbang marlapatan tong do i memiliki hagogoon. Boi do galumbang i mambahen mate jolma. Di ayat 11 mansai tangkas, ia galumbang pe unduk do maradaphon Jahowa. Molo songon i, aha ma sipangasahon manang ulaon dia do na boi sipangasahon maradaphon Jahowa? Tung na so tolap do angka ulaon ni jolma manang habisuhon ni jolma laho sipatudohon tu ulaon ni manang huaso ni Jahowa? Molo songon i do hape, nang pe dibagasan parungkilon manang sitaonon na dokdok jolma i, unang ma mangasahon ulaonna na denggan maradophon Jahowa. Berarti aha do na pinangido disi?

            Molo talanjuthon sahat tu 41, sude do dipabotohon Jahowa tu si Job taringot tu huaso-Na, jala laos diuduti ma di bindu 42 na paundukhon diri si Job dohot manolsoli angka pambahenanna nang hatana pe. Dipabotohon Jahowa tu huasona laho pataridahon pangaramotion dohot pandonganion-Na tu ganup na tinompaNa, jala ndang adong na so sian parbinotoan ni Jahowa aha na masa di tinompa-Na.

Refleksi Teologis

            Molo manat tapaihuihut patujolo sahat tu hatorangan ni turpuk Jamita on, tontu do nunga boi taalusi angka sungkunsungkun na husungkunhon di patujolo turpuk on. Alai ingkon boi do taantusi aha do tujuan ni sitaonon manang parungkilon. Sitaonon manang parungkilon ndada sian Jahowa. Ndang hea Jahowa patupahon sitaonon manang parungkilon. Alai dipaloas Jahowa do sitaonon manang parungkilon ni songgop tu jolma. Parungkilon manang parsitaonon boi do marlapatan tu uhum ni Jahowa. Alai unang holan sebatas tu pangantusion si songon i. Parsitaonon manang parungkilon boi do dalan ni Jahowa laho patandahon dohot papatarhon pangurupion dohot pandonganion-Na tu ganup na tinompa-Na, termasuk ma tu jolma. Laos i ma na patubuhon hasatiaon di haporseaonna nang pe mansai dokdok sitaononna i. Jala halak na satia dibagasan haporseaonna, taruli do dua hali lipat ganda sian na jinalo na hian, molo nunga jumpang tingki na denggan na pinatupa ni Jahowa.

            Di tingki nuaeng, torop do jolma mangalului ragam angka na instan jala praktis alai boi mamuashon hagiotna. Laos songon i ma nang torop ni jolma na mangalului dalan pintas, jala instani asa boi ibana malua sian angka hasusaan manang parungkilon na diadopi. Alani i, torop ma jolma tarlumobi halak Kristen holan mangasahon angka parbinotoanna manang ulaonna laho haluar sian parungkilonna i. Dipabotohon Jahowa pe angka huaso dohot gogo-Na tu si Job, laho mambuha (open) pangantusion ni si Job taringot Jahowa, Debata na dihaporseaon-Na i.

Sian turpuk on, boi do ganup jolma tarlumobi halak Kristen na sai olo maeoleol (molengmoleng) haporseaonna molo songgop sitaonon manang parungkilon di ngoluna. Jotjot do mandok, “didia do Jahowa, nunga torop angka ulaon na denggan na naung huula, ringgas do au martangiang huhut marminggu, alai boasa ma sai tong au marungkil di ngolu on?” Marhite turpuk on, tangkas dipabotohon, ia Jahowa na tahaporseai marhite Jesus Kristus jala na mangaramoti parngoluanta marhite Tondi-Na na badia, ima Debata na pargogo na so hatudosan. Tung so hea do Ibana manadinghon jolma na tinompa-Na i punjung manaon angka sitaonon i. Molo nunga dapot tingkina, dapot ma parbue ni hasatiaon i, dua hali marlipat ganda. Jahowa, Ibana ma na mandongni hita ganup ari ganup taon, tumpahanNa do langkangta urupanNa do hita manaon.  Amen.

KHOTBAH PENTAKOSTA I, 27 MEI 2012

Roma 8: 22 – 27

Anak dohot Panghirimon

Patujolo

            Somal na do angka jolma manghirim. Jala panghirimon torop ni halak ima panghirimon na denggan tu dirina. Tung na so adong dope hujumpang sahat tu sadari on halak na manghirim na roa tu dirina, tontu do angka na denggan dihirim. Halak na manghirim patuduhon halak na nampuna visi jala optimis. Molo halak na manghirim, tontu adong do na ingkon sibahenonna asa jumpang songon na dihirimna i. Tudos ma i tu halak na memiliki visi, ingkon adong do misi na binahen asa jumpang visi i. On ma na pataridahon, molo panghirimon na mangolu i ndang na holan manghirim molo so diihuthon ulaon. Isarana, molo adong sahalak anak na manghirim (bercita-cita) gabe sahalak dokter, molo bermalas-malasan do ibana tontu do ndang jumpang songn na dihirimna i (cita-cita); alai molo ringgas do ibana mangulahon ulaonna na berhubungan tu na dihirimna i, tontu do jumpang ma songon na dihirimna i.

            Songon i do nang diturpuk ni jamita on, na patanakhon manang patanghon panghirimon ni huria na parjolo i nang songon i tu hita na manjaha turpuk on, taringot sihirimonna di bagasan haporseaonna. Molo manat tajaha turpuk on dimulai sian ayat 1, dipabotohon si Paulus do asa huria i mangolu di bagasan Tondi, jala Tondi mian di bagasan huria i. Laos i do na pataridahon, molo ibana mian di bagasan Tondi jala Tondi maringanan di ngoluna, ido anak ni Debata. Molo nunga mian Tondi i di bagasan ngoluna, marlapatan ma i jolma i unang be mangadop tu daging, jala marguru tu daging. Molo marguru tu daging do jolma i, mate ma ibana. Molo nunga mian Tondi i, marparange ma songon halak na ginohan ni Tondi jala marparbuehon parbue ni Tondi. Jala marhite olo ngolunta ditogihon Tondi, gabe patar ma hita gabe anak ni Debata (ay. 1 - 16).

            Tondi dia do na didok di turpuk on? Tondi na didok di turpuk on ima Tondi Parbadia, laos i do na dipestahon sude huria na adong di gulmit ni portibion. Pesta hasasaor ni Tondi Parbadia. Tondi na sian Jahowa. Hasasaor ni Tondi Parbadia, marlapatan jala papatarhon hasasaor ni Jahowa dohot hasasaor ni Jesus Kristus marhite Tondi na Badia na sian Jahowa, jala na pinabagabagahon ni Kristus andorang mate Ibana (Joh. 14).

Hatorangan ni turpuk

            Sahat ma tu hatorangan ni turpuk. Songon na pinatorang di patujolo, andorang Jesus mate Ibana dibagabagahon do Tondi Parbadia (Joh. 14: 16-24). Jala jumpang ma na pinarbaga-Na i marhitehite hasasaor ni Tondi Parbadia tu angka apostel dohot tu huria na parjolo i. Marhite hasasaor ni Tondi i, pataridahon na saor do Jahowa marhite Tondi-Na na badia ima na patubuhon hagogoon di halak na gale manang na maheu, apulapul tu halak na tariluilu, asa jumpang panghirimon ni halak na porsea di bagasan Kristus nang pe ingkon mangodopi haporsukhon manang parungkilon sian portibi on. Panghirimon ni halak Kristen iman panean di hangoluan saleleng ni lelengna.

            Diparhatopot si Paulus do parungkilon manang sitaonon i mansai dokdok situtu do gabe sahalak Kristen di masa i. di tongatonga na masa i, dipaingot ibana do status ni ha-anakhon. Halak na naung digohi Tondi jala tinogihon Tondi, ima anak ni Jahowa, na pataridahon hajonokhon ni hubungan tarsongon anak tu amana. Secara teologi, anak tu bapana jonok do. Anak dang mabiar tu amana, ala amana i parasiroha jala mamboto dia do na denggan tu ianakhonna, jala anak manghasaphon amana. Adong kedekatan na mansai uli. Songon i do hita maradophon Jahowa. Jahowa Amanta, Jesus gabe anak siahaan laos marhite Jesus hita diait gabe anak ni Jahowa, Debata na gogo i. Molo nunga anak hita, marlapatan ma i hita pe ingkon unduk do maradophon Jahowa, Amanta marhite Kristus. Molo unduk do hita tu Ibana, gabe panean ma hita.

            Ala mansai dokdok do sitaonon i ndang hea Jahowa selaku Ama manadinghon punjung hita songon anak-Na ala haporseaon dibagasan Kristus. Dilehon ma Tondi Parbadia saor, tu huria na parjolo i, jala sahat ma tu hita sadari on, sai tongtong do dilehon Jahowa Tondi na badia i laho margogoihon hita jala manogunogu hita tu panghirimon na mangolu i. Laos i do na tapestahon di pentakosta.

            Andorang di ayat 22 dipabotohon do dokdok ni sitaonon di portibi on jala huhut do dipabotohon taringot panghirimon: paluaon ni Jahowa ma na tinompa i sian pangadopan hamagoan, sahat tu haluaon hasangapon na di angka anak ni Debata (ay. 21). Saonari, sadihari do jumpang panghirimon i? Tung na so adong do jolma di portibi on na  mamboto sadihari do panghirimon i jumpang? Alai nang pe songon i, sai tongtong ma manghirim, jala na tahirim i tontu do na so taida dope, molo nunga taida ndang be panghirimon goarhon i. Sarupa ma songon sahalak anak na manghirim gabe sahalak dokter. Anak na manghirim gabe sahalak dokter ima halak na so dokter dope; molo nunga gabe dokter do ibana, ndang gabe sihirimon be dokter i. songon i do nang jolma di panghirimonna. Nang pe so diida, alai dapotan ma ibana di jumpang ni panghirmon i molo huhut dibagasan parulaon dohot tinogihon ni Tondi na badia i. (ay. 22-25).

            Songon naung dipatorang, ia parsitaonan ni huria na parjolo i mansai dokdok do jala boi do mambahen halak Kristen na parjolo i manang huria na parjolo i mandele manang gotap haporseaonna, dang manahan di parungkilon na diadopi. Jahowa songon sada Ama dang hea manadinghon anak-Na punjung di sitaononna. Dilehon do Tondi-Na na badia i laho mangurupi di hagaleon manang sitaonon, jala marhite Tondi i do manghondihon huhut mangajari/ marbisuki laho mangido pangidoan na tama huhut marhite hata na hinoihon na so tangkas hinatahon (bhs Indonesia: keluhan-keluhan yang tidak terucapkan) tu Jahowa, Amanta. Jahowa do umboto saluhutna, jala dipatupa Ibana do dia do na porlu di anak na hinaholongan-Na jala adong do siteanon ni ganup halak na boi manahan ro di ujungna.

Refleksi-Teologi

            Gagal menghasilkan ke-tidakada-an. Sesuatu yang gagal berarti tidak sampai atau tidak mendapatkan apa yang diharapkan. Jatuh, rumit atau gelombang, atau kekhawatiran bukanlah suatu kegagalan tetapi suatu proses untuk dapat bangkit untuk mendapatkan apa yang diharapkan atau yang dicita-citakan. Kecerobohan atau putus asa adalah kunci menuju kegagalan. On ma pandohan na mandok asa unang halak Kristen gagal mandapot siteanon ni halak Kristen na manahan ro di ujungna. Molo nunga jumpang na dihirim i, pasti do dang magopo angka hansit na ditaonna i di tingki andorang jumpang na nihirim i. Tarsongon sahalak ina naeng manubuhon anak/ boru buhabajuna. Ragam do sitaonon na diadopi di masa denggan pamatangna (hamil). Di tingki naeng manubuhon buhabajuna i, mansai hansit situtu do sitaononna. Alai dung diida ibana na nihirim i ima buhabajuna i, angka sahit na diadopi di tingki manubuhon, dang diingot be i, jala ndang marlapatan martimbangkon las ni rohana mandapot na ni hirimna.

            Songon i do hita di parngoluan on. Molo songgop do parsitaonan na dokdok manang na borat, unang pintor hatop mangalului gogo sian portibi on, manang mangasahon gogona sandiri. Adong do Jahowa, Ama pargogo jala parasiroha na so hatudosan. Pangido ma Tondi-Na i asa i margogoihon huhut mangajari huhut mamparbisuki hita di tongatonga parsitaonon i. Tondi i ma na margogoihon, mangapuli huhut na mangondihon hita mangido tu Ama i di tongatonga parsitaonon di ngolunta.

            Molo nunga songgopan ni Tondi Parbadia, parulaonta pe ingkon ma parulaon na marparbuehon parbue ni Tondi. Unang be marparange marguru tu hisaphisap ni daging dohot portibi on. Manahan ma ro diujungna, paima jumpang tingki panghirimon ni haporseaonta. Ulahon ma ulaon ni halak na mian Tondi parbadia. Unang asangi gogo manang sinadongan, alai loas ma Tondi na badia i mangaramoti margogoi, huhut manogu laho patanghon haporseaon dohot panghirimon i. Amen.